Bizim Merziye

Tuesday, July 13, 2004

من گونشى سئويره م!


دؤرد: ١٦ آذر-٥١ دالغا


اوشاقليق عالمى ايدى٬ اوره ييم ايشيق ايدى
كيچيك٬ تميز دونياما٬ اويون ياراشيق ايدى
يولداشلاريم دؤورومده٬ هامىسى شاد٬ كينه سيز
بير آن كوسو اولسايدى٬ گينه باريشيق ايدى

قارانليق قورخمالى ايدى٬ آمما اوندان قاچمازديق
گئجه لر ناغيللاردا٬ شيرين٬ تميز محببت
بيزى باريشديراردى٬ دئمك اونا گؤره ده
كؤنلوموزون قاپيسين٬ كينه لره آچمازديق

ائله بيل گؤزلريميز٬ گئجه لر ده گؤروردو
اولدوزلار٬ آى گونش تك٬ بيزه ايشيق وئره ردى
بير بئله ايشيقينان٬ گؤيه بولوت گلسه يدى
گئچه رى كيچيك بولوت٬ گونون اوستون آلسايدى
بيلرديك گون چيخاجاق٬ بولوت دا قالماياجاق
گئنه ده دسته له شيب٬ دؤزمه ييب باغيرارديق
گونشى نغمه لرله٬ قوناغا چاغيرارديق
"گونوم گئديب سو ايشسين٬ آبى دونون دييشيسن"
…………
"گونوم! چيخ٬ چيخ!"

آيلار٬ ايللر دولاندى
زامان ناققا باليق تك٬ اوشاقليغيمى اوتدو
گئچه رى غملريمين٬ كيچيك سئوينجلريمين
يئرين بؤيوك كدرلر٬ گئچمز كينه لر توتدو
گونش بيزيم مملكتدن اوغورلاندى٬ توتولدو
ايستى٬ ايشيق چئشمه سى٬ پاك قورودو٬ قورتولدو

ايندى ايللردن برى٬ گئجه لريمى آىسيز
گوندوزلريمى گونسوز٬ باشا چيخارديرام من
سويوق٬ نيفرت٬ آلدانميش يوردوموزو بورويوب
شادليغين٬ سعادتين كؤكو ديبدن قورويوب

هئچ زاد قارانليق كيمى٬ منيم كؤنلومو سيخمير
او دؤزمز اوشاقليغيم٬ بير آن ياديمدان چيخمير
ايندى نئجه تابلاشيم بير بئله قارانليغا؟

داها دوشونوره م كى گونش تكجه بوردان يوخ
آيرى اؤلكه لردن ده٬ يامانجا اوغورلانيب

بونو دا دوشونوره م٬ گونشلرين دوستاغين
اوشاقليقدا اوخويان نغمه لر ييخا بيلمز
او قارا دوستاقلاردا٬ يالقيز سس چيخا بيلمز

آتا بابا سؤيله ين٬ دمير چاريق كؤهنه ليب
ايندى بو چتين يولدا دمير آياق لازيمدير
دمير عصا آتيليب٬ ناغيللارا قاتيليب
ايندى دميردن توفنگ٬ حدسيز و حئسابسيز فيشنگ
خالقين سؤنمز عئشقيندن٬ بوردا داياق لازيمدير

هر كس گونشى سئوسه٬ بوتون سئوگىسين آتار
يورولوب يولدا قالماز٬ اؤزون ده يادا سالماز
اوزاق داغلار داليندان٬ گئده ر گونشى تاپار

ايندى سوروشمالىيام٬ من گونشى سئويره م؟
من گونشى سئويره م!

0 Comments:

Post a Comment

<< Home