Bizim Merziye

Thursday, July 15, 2004

گؤزله يين گلرم بير گون يانيزا


اوچ: اوشاقلارى چيلقينجا سئوه ن٬ ايگيد اشرف´ه
به اشرف قهرمان كه كودكان را عاشقانه دوست دارد:




قاپىدا دايانيب بير چوپور افسر
كارتلاريميزا باخير٬ ايچه رى قويور
گؤزلرى قيزاريب٬ آغزى كف له نيب
حيرص٬ اونا باخاندا آدامى بوغور

بير الينده باتوم٬ بيرينده بىسيم
بير اوجدان باغيرير٬ دؤيور٬ ساواشير
همقاتارلارى دا٬ دوروبلار اوردا
هامىسىنا گؤزه تچىليك ياراشير

قويونو سورودن آييران كيمى
هر كسى ايسته يير آپارير اونلار
اوشاقلار دايانيب قاپى اؤنونده
نيگاران باخيشلار٬ قاينايان قانلار

بير قيز يولدان گلير٬ يامان تله سير
قاباغين كسيرلر: كارتيزى وئرين!
قيز دايانير٬ قورخمور٬ ديك باخير اونا
گؤرونور٬ بيليرى شهامت يئرين

"سنين نه حاققين وار يولو كسه سن؟"
؟؟؟؟؟؟؟؟؟؟؟؟ (بو ميصراع دوشوبدور)
؟؟؟؟؟؟؟؟؟؟؟؟ (بو ميصراع دوشوبدور)
؟؟؟؟؟؟؟؟؟؟؟؟ (بو ميصراع دوشوبدور)

قاباغين آلانمير او يورغون افسر
قيز اؤزون قورتارير٬ يولونا گئدير
باخيشلار اوخشايير بو قورخمازليغى
هر كس اونو گؤرور٬ برك آلقيش ائدير

يامان توخونورو بو ايش افسره
وارليغى بنزه ين گؤزه تچى ايته
نيفرت گؤزه تچىسى٬ زور گؤزه تچىسى
آناسى اوتانير وئردييى سوته

باخيشلار آلتيندا آيدين ازيلير
درين نيفرتلرى قانير٬ كيچيلير
بير گون خالقين اوغلو٬ سئويملىسى ايميش
ايندى زور گؤزله يير٬ خالقدان سئچيلير

گليرم كيلاسا٬ باشيم آشاغى
اوره ييم توتولوب٬ بدنيم اسير
ائله توتقونام كى دولو بولوت تك
كينه٬ ناچار دؤزوم باغريمى كسير

اوستاد ايفاده ايله كيتابدان اوخور
اوشاقلار هامىسى تئز تئز يازيرلار
ائله هئچ زادى گؤرمه ييب اونلار
قلمنن سوكوتون جانين پوزورلار

دييه سن حاققىيميش زور دئسين افسر
دييه سن كيچيلمك اونلارا٬ خوشدور
كيمسه نى سينديرير بير اَيرى باخيش
كيمىنه يامان دا٬ تپيك ده نوشدور

كيچيك اوشاقلارا "تئست" يازيرلار:
بارماغيوى كسرسن٬ نئيله يه جكسن؟
؟؟؟؟؟؟؟؟؟؟؟؟ (بو ميصراع دوشوبدور)
توپووو ايتيرسن٬ نئيله يه جكسن؟

گؤزلريم قارالير٬ كؤنلوم سيخيلير
آخى بئله سؤزلر نه ايش وئره جك؟
كيمسه دوشونور كى٬ آج اوشاقلاردان
كيم بئله ياوا سؤزلرى سئوه جك؟

چيلپاق آياقلارا٬ آج قارينلارا
توپدان دانيشماغين معناسى يوخدور
ايشدن باش آچميرلار اويناماق اوچون
سوروشمالى دردلر اونلاردا چوخدور

هانسى توپو وار كى ايتيرسين اونو؟
آج آج ايشله مكدن گليبلر جانا
اللرى كسيلير دفه دؤيمكدن
بارماقدان نئجه من دانيشيم اونا؟

قوى اوستاد دئسين كى پيس موعلليمم
من اونون سؤزلرين قانا بيلميره م
آمريكائى اوستاد سئومه سين منى
اوشاقلارين عئشقىنى دانا بيلميره م

درديميز بير دئييل٬ ساواديميز دا
او اؤرگه دن سؤزلر درديمه دَيمز
قورخمورام نومره مى آز وئرسين اوستا
نومره نين آزليغى٬ باشيمى اَيمز

آمما قورخورام كى يوخسول اوشاقلار
بو سؤزلره گؤره منى آتسينلار
"نرگيس"ين٬ "سالمان"ين يورغون گؤزلرى
من بئله دانيشام٬ ياشا باتسينلار

اوشاقلار قورخمايين٬ ياديمداسيز سيز
هئچ زامان سيزلرى اونودماميشام
گله جه يم گئنه سيزين يانيزا
دالغين كينه لرده قاناد يوموشام

سيزه بئله ياوا دانيشمارام من
كسيلن بارماغى هر گون گؤرورسوز
سوروشماق ايسته مير كرگاه داليندا
بارماق كسيلنده٬ قانين سورورسوز

سيزه بئله سؤزلر هئچ لازيم دئييل
كسمه لى اللردن دانيشاجاغام
اويناتمالى توپدان نه قانيرسيز سيز؟
دانيشسام اوره كدن آليشاجاغام

كيم سيزه توپ آليب٬ اويناتماق اوچون؟
كيم قويوب گئده سيز توپ اويناماغا؟
اربابلار آللاهى ياراديب سيزه
ظولوم قازانلاريندا قايناماغا

آنجاق توپدان گره ك دانيشام سيزه
اويناتمالى توپلار ايشيزه گلمز
بؤيوكدور٬ پولاددير من دانيشان توپ
اونون جانينى هئچ دفه ده دلمز

ياخچى ايشه سالساق پولاد توپلارى
ال كسن دفه لر مين پارچا اولار
بارماقلاريز توخدار٬ اللريز توخدار
اربابلار قالمازلار٬ كرگاهلار قالار

پولاد توپ ياخشىجا ايشينى گؤرسه
بئليزده قوز اولماز٬ رنگيز ده سولماز
قارانليقلار گئده ر٬ يوخسوللوق گئده ر
حياتيز گول آچار٬ سولغونلوق قالماز

اوشاقلار گؤزله يين منى
يولدايام٬ گليره م من سيزه سارى
حياتيما معنا سيز باغيشلاديز
ياخچى دوغرولدايديم اونو٬ من بارى

بير گون چاتاجاغام گؤزله يين منى
آياغيم چاتماسا٬ فيكريم چاتار كى
هئچ زامان دوشمنه ساتمارام سيزى
درين بؤيوك عئشقين٬ كيمسه آتار كى؟

گؤزله يين گلرم بير گون يانيزا
هامىميز بيرله شيب يولا دوشه ريك
محببتى و عئشقى بوتون ائللره
پايلاريق٬ هامىميز گؤزه ل ياشاريق

0 Comments:

Post a Comment

<< Home