بيزيم مرضييه
سؤزوموز
بيزيم مرضييه: آزه‌ربايجانلي قوشوقچو و يازار، تورك خالق قهره‌ماني، مرضيه احمدي اسكوئي ١٣٥٣-١٣٢٤ (١٩٧٤-١٩٤٥)
مرضييه اوسكويي بير يازار، بير قوشار (شاعير)، بير اؤيره‌تمه‌ن (موعه‌لليم)، بير قادين، بير امه‌كچي، بير اولكوجو (ايدئآليست)، بير دئوريمچي (اينقيلابچي)، بير خالق باهاديريدير (قهره‌مانيدير)! تورك خالقينين يئتيشديردييي بو آري اوره‌كلي (پاكدل)، آيدين دوشونجه‌لي؛ خالقي، يوردو و آناديلينه درينده‌ن باغلي اولان گؤزه‌ل اينسان، تك كلمه‌ده آزه‌ربايجان`ين اوزو آغي و باش اوجاليغيدير. او، تورك خالقينين اؤزگورلويو (آزادليغي) يولوندا گنج جانيني بيله اسيرگه‌مه‌يه‌ن سئويملي، نيسگيللي، شهيد قيزيدير. او "من يازارليقلا ياشاماق ايسته‌ميره‌م، ناغيللاريمي ياشاميملا يازماق ايسته‌ييره‌م" ديييردي و بونو دا قله‌مي ايله، ياشامي ايله دوغرولادي. مرضييه`نين هم قارا داوات، هم ده آل قاني ايله يازديقلاري، خالقيميزدا اونا قارشي سونسوز بير سايقينليق قازانديرميش، آنيسي (خاطيره‌سي) و سئوگيسيني اوره‌كله‌رده و بئينله‌رده منگيله‌شديرميشدير (ابه‌ديله‌شديرميشدير).
بوگون مرضييه`نين مزاري، تورك خالقي و آزه‌ربايجان`ين باشقا شهيد دوشموش ائولادلاري بهروز دهقاني، عليرضا نابدل، كرامت الله دانشيان، بيژن جزني، عبد مناف فلكي، محمد حنيف نژاد، سعيد محسن، اصغر عرب هريسي، محمد بازرگاني، علي باكري، جعفر اردبيلي، احمد جليل افشار، حبيب برادران خسروشاهي ..... ايله بيرليكده تئهران`ين "بئهئشت-ي زهرا" قبريستانليغينين ٣٣ ونجو قطعه‌سينده، بو قهره‌مانلارا هئچ بير شكيلده ياراشمايان ييخيق و باخيمسيز، اوتانج وئريچي بير دورومدا بيراخيلميشدير. بو تورك خالقي و آزه‌ربايجان`ين شهيد اوغول و قيزلاري و مزارلاري ايله ايلگيلي (علاقه‌لي) مساله‌له‌رده -بونلارا فارس گوروهلار صاحيب چيخسا دا - تورك خالقي و آزه‌ربايجانلي قوروم-آيدينلاري، باشقا چوخلو قونودا (مووضوعدا) اولدوغو كيمي، چوخ تاسسوفله بوتونو ايله آيمازليق (غفله‌ت) و لاقئيدليك ايچينده‌ديرله‌ر. بو عزيز خالق شهيدله‌رينين هاميسينين اؤزله‌رينه ده، قبيرلرينه ده صاحيب چيخيلماسي -دونيا گؤروشله‌ري و سيياسي مشي‌له‌رينه باخمادان- تورك خالقي و آزه‌ربايجان قورولوش-درنه‌كله‌رينين ميللي بورجو و اينساني گؤره‌ويدير (وظيفه‌سيدير). بونلار تورك خالقي و آزه‌ربايجان`ين تاريخي، تاريخي ده‌يه رله‌ريديرله‌ر؛ بونلار بيزيم دونه‌نيميز، بوگونوموز و يارينيميزديرلار! تاريخي اولمايان، تاريخي اولوب دا اونو بيلمه‌يه‌ن، تاريخي ده‌يه‌رله‌ريني قورومايان، اونلاري قورويامايان بير خالق، يوخ اولماغا محكومدور. بوندان آرتيق گئج قالينمامالي!!!
----------------------------
ياشامى: مرضييه احمدي اوسكويي، ١٣٢٤گونه‌ش ايلينده، تبريز`ين ياخينليغيندا يئرله‌شه‌ن، آزه‌ربايجان`ين كيچيك شهرله‌رينده‌ن اولان اوسكو`ده، اورتا حاللي اكينچي بير عاييله‌نين اوشاغي اولاراق دونيايا گلدي. اوشاقليق چاغيندان آتاسينين يانيندا تارلالاردا ايشله‌مه‌يه باشلادي و ائله لاپ بو كيچيك ياشلاريندان يوخسول كندليله‌رين آجي و چيله‌له‌رييله، درد و اوزونتو دولو ياشاملارييلا تانيش اولدو. مرضيه ايلك اوخولو قورتاراندان سونرا ليسه‌يه داوام ائتدي. ائييتيمينين (تحصيلينين) بو دؤنه‌مينده، كيتاب اوخوماغا ماراق بسله‌ييب گئتديكجه اوخوماغا قارشي بيله‌سينده آشيري و درين بير سئوگي اولوشدو. بو ايلله‌ر، مرضييه`نين ايجتيماعي سورونلار حاققيندا داها بيليگلي اولان اينسانلارلا تانيشما و سيياسي مساله‌له‌ره آرتاراق تسه‌للوط تاپما ايلله‌ريدير.
ليسه‌نين ايلك دؤوره‌سيني قورتارينجا، تبريز`ين "دانشسراي مقدماتي"سينه گيردي و بورايا گيرمكله ده سول و ماركسيسم گؤركسؤزو (اده‌بيياتي) ايله تانيش اولدو. "مقدماتي دانشسرا"دا ايكي ايلليك بير ائييتيمده‌ن (تحصيلده‌ن) سونرا اؤيره‌تمه‌ن (موعه‌لليم) اولاراق ايشه آلينيب اوسكو`نون ايلك اوخوللاريندا اؤيره‌تمه‌نلييه آتاندي (منصوب اولدو). مرضيه اوچ ايلليك اؤيره‌تمه‌نليك ياشامي و اوشاقلار و عاييله‌له‌ري ايله قوردوغو ايليشگي و ياخين باغلار سونوجوندا، اونلارين چيله‌له‌ري و آغير ياشام قوشوللاري (شرطله‌ري) ايله داها دا ياخيندان، داها دا كؤكلو بيچيمده تانيش اولما اولاناغيني (فورصه‌تيني) الده ائتدي. اوچ ايل اؤيره‌تمه‌نلييين آرديندا، ليسه ديپلومونو آلماني باشاران مرضييه، تبريز بيلييوردونا گيردي. يونيوئرسيته‌ده ايكه‌ن، عئيني زاماندا اؤيره‌تمه‌نليك و اوشاقلارا درس وئرمه‌يه ده داوام ائتدي. ١٣٤٥ ايلينده آغير آقچال (مالي) قوشول و سيخينتيلار نده‌ني ايله، تئهران`ين "دانشسراي عالي سپاه دانش "ينه گيرمه‌يه مجبور اولدو. بوندان سونرا تئز تئز ورامين`ين تورك و فارس كندله‌رينده گزينمه‌يه، كند اوخوللارينا (مدرسه‌له‌رينه) اوغراماغا و كندلي اوشاقلار اوچون كيتاب ائوله‌ري ياراتماغا باشلادي.
مرضييه اونيوئرسيته‌ده ايكه‌ن، فععال بيچيمده (شكيلده) سيياسي-صينفي فعالييه‌تله‌ر و اؤيره‌نچي ائعتيصابلارينين چوخونا قاتيليردي. ١٣٤٩ ايسفه‌ند آيي اؤيره‌نچي ائعتيصابلاريني ياراتماقدا ايسه اؤزو، بؤيوك بير اوينام (رول) اوينادي. و بو اوزده‌ن ساواك- خالق دوشمه‌ني شاه رئژيمينين سيياسي پوليسي – طره‌فينده‌ن تاتينيب ايزله‌نمه‌يه آليندي. بونا رغمه‌ن اؤيره‌نچيله‌ر آراسيندا بؤيوك سايقينليغا صاحيب اولدوغو و گله‌جه‌ك ائعتيصابلارين قورخوسوندان، مامورلار مرضييه`نين ياخالانماسيندان واز گئچديله¬ر. ١٣٥٠ ايلين خورداد آييندا "عالي دانيشسرا"نين تعطيله گيرمه‌سي ايله همين آيدا مرضييه ساواك طره‌فينده‌ن توتوقلاندي. اوزون بير سوروشدورمادان سونرا بيراخيلدييسا دا، سياسي فعالييه‌تله‌ريني قيسيتلاماق آماجي (مقصه‌دي) ايله اوسكو شهه‌رينه سورگونه گؤنده‌ريلدي. اوسكو`ده ايكه‌ن بير ياندان گؤركول (اده‌بي) يازيلار يازير، اؤته ياندان ليسه اؤيره‌نچيله‌رينين سيياسي بيلگيله‌ريني آرتيرماغا چاليشيردي. آمما قيسسا بير سوره‌ده‌ن (مودده‌تده‌ن) سونرا، داها فرقلي و گنيش فعالييه‌تله‌ره يؤنه‌ليب، ١٣٥١ ده تئهران`ا گئده‌ره‌ك نئچه يولداشي ايله بيرليكده ماركسيست بير گوروه اولوشدوردو. ١٣٥٢ ده ايسه "خالقين فدايي چئريكله‌ري هؤرگوتو" (خ.ف.چ.ه.) ايله تماسا گئچيب اونلارين جرگه‌سينه قوشولدو. مرضييه، بوندان سونرا خالقينين ميللي آزادليغي و ازيلميشله‌رين، يوخسوللارين قورتولوشو اوغروندا فارس شووئنيسمي، پهله‌وي ظولمو و امپئريياليسم تسه‌للوطونا قارشي قاتيلديغي سيلاحلي ساواشيمدا (موباريزه‌ده) فععال شكيلده ايشتيراك ائديب ان سون دا گيزلي ياشاما گئچدي.
قيسا بير سوره‌ليك (خ.ف.چ.ه.) نين آزه‌ربايجان اياله‌ت سوروملوسو اولان مرضييه بير ايل سونرا، ٦ اورديبئهئشت ١٣٥٣ ده ساواك گوجله‌ري ايله گيردييي ياراقلي (سيلاحلي) بير چاتيشمادا ياشاميني ايتيرميشدير: بير جومعه گونو خ.ف.چ.ه. اويه‌سي (عوضوو) اولان شيرين معاضد، باشقا بير يانداشلا (سمپاتيزانلا) بولوشماق (قرار ملاقات) اوچون يولا چيخير. بو بولوشمادان ساواك داها قاباقجادان دويوم (خبه‌ر) آلميشدير و بوتون بؤلگه‌ني بير نئچه كيلومئتره چاپيندا قوشاتميشدير (موحاصيره ائتميشدير). بولوشما اولاييندان خبه‌ري اولان مرضييه، مامورلارين تئلسيزيني دينله‌يه‌ره‌ك، ساواك`ين بولوشمادان خبه‌ردار و بؤلگه‌نين ده قوشاتما آلتيندا اولدوغونو اؤيره‌نير. بو مساله‌ني اؤيره‌نه‌نده‌ن سونرا، بيله‌سيني تهديد ائده‌ن تهليكه‌يه آلديرمادان، يولداشي شيرين معاضد`ه خبه‌ر وئرمه‌ك و اونو قورتارماق آماجي ايله، قوشاتما آلتيندا اولان بؤلگه‌يه گئدير. شيرين`ي تاپيب اولايي اونا بيلديره‌بيلسه ده، ساواك گوجله‌ري طره‌فينده‌ن موحاصيره‌يه دوشوروله‌ن و اوتوماتيك توفه‌نگي اولان مرضييه، بو سون ائشيت (برابر) اولمايان ساواشيمدا، اؤلدورولور. (چاتيشمادا ديري اله گئچيريله‌ن شيرين معاضد اينتيحار ائتمه‌يه قالخيشير، آنجاق باشارامير و داها سونرا ساواك توتساغيندا آغير ايشكنجه‌له‌ره معروض قالاندان سونرا اؤلدورولور).
ياپيتلارى: مرضيه يازارليق و قوشوقچولوق يئتيسينه (ايستئعدادينا) يييه ايدي. يازديغي گؤركول يازيلار، قيسسا سؤرجه‌ك (ناغيل) و قوشوقلاريندا خالقين آغير ياشام قوشوللاري و دؤزولمه‌ز آجيلاريني ديله گتيريردي. دئوريمين (اينقيلابين) ايلك گونله‌رينده اونون دالقا آدلي ناغيلي، او دؤورده ايلك چاپ اولان و ان چوخ به‌يه‌نيله‌ن رومانلاردان بيري ايدي. مرضييه اوسكويي`نين فارسجا و توركجه بوتون ياپيتلاري (اثه‌رله‌ري) هله ده توپلو اولاراق چاپ ائديلمه‌ميشدير.
مرضييه`نين اينتئرنئتده بولونان فارسجا ياپيتلاريندانداستانى بر مبناى زندگى رفيق على اصغر عرب هريسى٬ تجربه نخستين مرگ٬ دختران كولى
مرضييه`يه منسوب ائديله‌ن و چوخ ياييلميش فارسجا "افتخار" آدلي بير قوشوق (شئعر) واردير. بو شئعر اصلينده مرضييه`يه دئييل، پري (غزال) آيتي`يه عاييدير) .
آشاغيدا بو گؤزه‌ل اينسانين اؤلومسوز آنيسينا، يئددي توركجه قوشوغونو سونورام:
گرچه‌يه هو!!!!
0 Comments:
Post a Comment
<< Home