سؤزوموز
٣٣ ونجو قطعه: بونلار بيزيم دونه‌نيميز، بوگونوموز و يارينيميزديرلار!!
آزه‌ربايجانلي قوشوقچو و يازار، تورك خالق قهره‌ماني،مرضيه احمدي اسكوئي ١٣٥٣-١٣٢٤ (١٩٧٤-١٩٤٥)
مرضييه اوسكويي بير يازار، بير قوشار (شاعير)، بير اؤيره‌تمه‌ن (موعه‌لليم)، بير قادين، بير امه‌كچي، بير اولكوجو (ايدئآليست)، بير دئوريمچي (اينقيلابچي)، بير خالق باهاديريدير (قهره‌مانيدير)!
تورك خالقينين يئتيشديردييي بو آري اوره‌كلي (پاكدل)، آيدين دوشونجه‌لي؛ خالقي، يوردو و آناديلينه درينده‌ن باغلي اولان گؤزه‌ل اينسان، تك كلمه‌ده آزه‌ربايجان`ين اوزو آغي و باش اوجاليغيدير. او، تورك خالقينين اؤزگورلويو (آزادليغي) يولوندا گنج جانيني بيله اسيرگه‌مه‌يه‌ن سئويملي، نيسگيللي، شهيد قيزيدير. او "من يازارليقلا ياشاماق ايسته‌ميره‌م، ناغيللاريمي ياشاميملا يازماق ايسته‌ييره‌م" ديييردي و بونو دا قله‌مي ايله، ياشامي ايله دوغرولادي. مرضييه`نين هم قارا داوات، هم ده آل قاني ايله يازديقلاري، خالقيميزدا اونا قارشي سونسوز بير سايقينليق قازانديرميش، آنيسي (خاطيره‌سي) و سئوگيسيني اوره‌كله‌رده و بئينله‌رده منگيله‌شديرميشدير (ابه‌ديله‌شديرميشدير).
بوگون مرضييه`نين مزاري، تورك خالقي و آزه‌ربايجان`ين باشقا شهيد دوشموش ائولادلاري بهروز دهقاني، عليرضا نابدل، كرامت الله دانشيان، بيژن جزني، عبد مناف فلكي، محمد حنيف نژاد، سعيد محسن، اصغر عرب هريسي، محمد بازرگاني، علي باكري، جعفر اردبيلي، احمد جليل افشار، حبيب برادران خسروشاهي ..... ايله بيرليكده تئهران`ين "بئهئشت-ي زهرا" قبريستانليغينين ٣٣ ونجو قطعه‌سينده، بو قهره‌مانلارا هئچ بير شكيلده ياراشمايان ييخيق و باخيمسيز، اوتانج وئريچي بير دورومدا بيراخيلميشدير. بو تورك خالقي و آزه‌ربايجان`ين شهيد اوغول و قيزلاري و مزارلاري ايله ايلگيلي (علاقه‌لي) مساله‌له‌رده -بونلارا فارس گوروهلار صاحيب چيخسا دا - تورك خالقي و آزه‌ربايجانلي قوروم-آيدينلاري، باشقا چوخلو قونودا (مووضوعدا) اولدوغو كيمي، چوخ تاسسوفله بوتونو ايله آيمازليق (غفله‌ت) و لاقئيدليك ايچينده‌ديرله‌ر. بو عزيز خالق شهيدله‌رينين هاميسينين اؤزله‌رينه ده، قبيرلرينه ده صاحيب چيخيلماسي -دونيا گؤروشله‌ري و سيياسي مشي‌له‌رينه باخمادان- تورك خالقي و آزه‌ربايجان قورولوش-درنه‌كله‌رينين ميللي بورجو و اينساني گؤره‌ويدير (وظيفه‌سيدير). بونلار تورك خالقي و آزه‌ربايجان`ين تاريخي، تاريخي ده‌يه رله‌ريديرله‌ر؛ بونلار بيزيم دونه‌نيميز، بوگونوموز و يارينيميزديرلار! تاريخي اولمايان، تاريخي اولوب دا اونو بيلمه‌يه‌ن، تاريخي ده‌يه‌رله‌ريني قورومايان، اونلاري قورويامايان بير خالق، يوخ اولماغا محكومدور. بوندان آرتيق گئج قالينمامالي!!!
